(ශ්‍රීනගර්-ඉන්දියාව)
ජම්මු සහ කාශ්මීරයේ පූන්ච් හි හමුදා වාහනයකට ඊයේ(20) එල්ල වූ ත්‍රස්ත ප්‍රහාරයකින් ඉන්දීය සොල්දාදුවන් පස් දෙනෙකු මිය ගොස් තවත් අයෙකු බරපතල තුවාල ලබා ඇති බව ඉන්දීය NDTV ප්‍රවෘත්ති නාලිකාව පවසනවා. පස්වරු 3 ට පමණ භිම්බර් ගාලි ප්‍රදේශය අසලදී ත්‍රස්තවාදීන් විසින් මෝටර් රථයට වෙඩි තබා ඇති අතර පසුව අත්බෝම්බ ප්‍රහාරයක් හේතුවෙන් ගින්නක් හටගෙන ඇති බව ඉන්දීය හමුදාව පවසයි.
ප්‍රදේශයේ පවතින අධික වර්ෂාව නිසා ඇති වූ මීදුම තත්වය ප්‍රයෝජනයට ගනිමින් නාඳුනන ත්‍රස්තවාදීන් යුද හමුදා රථයට වෙඩි තබා ඇති බව යුද හමුදා මූලස්ථානය, උතුරු විධානය නිල නිවේදනයක් නිකුත් කරමින් කියා සිටියේය.
එම ප්‍රදේශයේ ත්‍රස්ත මර්දන මෙහෙයුම් සඳහා යොදවා සිටි රාෂ්ට්‍රිය රයිෆල්ස් ඒකකයේ සාමාජිකයින් පස් දෙනෙකු සිද්ධියෙන් මියගිය බව යුද හමුදාව පවසයි. ප්‍රහාරයෙන් බරපතල තුවාල ලැබූ තවත් සෙබළෙකු රෝහල් ගත කර ප්‍රතිකාර ලබනවා.(NC)
