ජය ශ්‍රී අයියා මලෝ කවදත් අපේකම අගයන දෙන්නෙක්. මේ දෙන්නගේ අලුත්ම නිර්මාණය වෙන ‘මතුවෙන්න - The Diamond Story’ පහුගියදා ජය ශ්‍රී යූ ටියුබ් නාලිකාවෙන් එළිදුටුවා. ජය ශ්‍රී ලා පහුගිය දවස්වල කිව්ව ඩයමන්ඩ් ගැන කතාවත් මේ ගීතයේ විෂුවල් වලින් දැකගන්නට හැකියි.
‘මතුවෙන්න‘ ගීතයේ පද හා රූප රචනය කරලා තියෙන්නේ සමන් අමුණුකන්ද. සංගීතය රැප්සිලා (සාරංග දිනේෂ්). රැප්සිලා මෑතකාලීනව ජනප්‍රිය වුණු ගීත ගණනාවක සංගීත නිර්මාණ ශිල්පියා ද වෙනවා. ඒවගේම, දෙස් විදෙස් ශිල්පීන් රැසක් මේ ගීතයේ රූප රචනයටත් දායක වෙලා තියෙනවා.
‘සිව්කොණ එකතුවෙලා
ජය කණුව සොයනා වෙලේ
සතුටෙන් එකතුවෙලා දූ පුතුන් හිනැහෙන බිමේ
ජයගන්නට හැකි තුරුම්පුවක් වී
ලොවටම පෙන්වන්න
මතුවෙන්න - පණදෙන්න
රුවි‍තේ - විඳගන්න
ජයගන්න’
‘මතුවෙන්න’ ගීතයෙන් ආරාධනා කරන්නේ, ජයගන්න පුළුවන් තුරුම්පුවක් වගේ, නැත්නම්, ඩයමන්ඩ් එකක් වගේ තමන්නේ දක්ෂතා ඔපමට්ටම් කරගෙන තාරුණ්‍යයට නැගිටින්න කියලා. මේ ඩයමන්ඩ් සංකේතය ‘මතුවෙන්න’ ගීතය පුරාවට දැකගන්නට හැකියි.
ලංකා‍ව පුරාම ගිහිං මේ ගීතයේ රූප රචනය කරලා තියෙන නිසා, ලංකාවේ හිටියත් තවමත් අපි දැකලා නැති ලස්සන තැන් ගණනාවක් මේ ගීතයෙන් දැකගන්නට පුළුවන්. දික්වැල්ල, හිරිකැටිය, නිලාවැල්ල, නිකවැරටිය, යාපනය වගේ අපේ රටේ තියෙන ආකර්ශණීය තැන් ගණනාවක් මේ අතරට අයිතියි.
‘මතුවෙන්න’ ගීතය පුරාවට දැකගන්න ලැබෙන සංකේතයක් තමයි ඩයමන්ඩ්. ජය ශ්‍රී ලා පහුගිය කාලේ කතා කළෙත් මේ ඩයමන්ඩ් ගැනයි. කොහොම වුණත්, ගීතය ආරම්භ වෙන්නෙත් ඩයමන්ඩ් එකක් ඇතුළට ජය ශ්‍රී ලා යනවා වගේ ෂොට් එකකින්. ගීතයේ ආරම්භයේ ඉඳන් අවසානය වනතෙක්ම මේ ඩයමන්ඩ් සංකේත දැකගන්නට හැකියි.
‘මතුවෙන්න‘ ප්‍රසංග වේදිකාවේ ගැයෙන ජය ශ්‍රී ලගේ ගීත අතරට වෙනස්ම රසයක් එක්කළ නැවුම් නිර්මාණයක් වෙනවා. ඒ වගේම කාලෙකට පස්සේ කරපු මේ නිර්මාණයෙන් අපේකම අගයන්නත් ජය ශ්‍රී ලා අමතක කරලා නැහැ.
