පාසැල් සිසුවෙකුට බරපතල ලිංගික අපයෝජනයක් සිදුකළ හාමුදුරුනමකට බරපතල වැඩ සහිත වසර 17 ක සිර දඬුවමක්
Thursday, 25 May 2023 - 8:16 pm
(කමල් සුරවීර- මහනුවර)
පාසැල් සිසුවෙකුට බරපතල ලිංගික අපයෝජනයක් සිදුකළ සිද්ධියකට අදාළව මහනුවර මහාධිකරණයේ විභාග වූ නඩුවකින් වරදකරු වූ චීවරධාරියෙකුට බරපතල වැඩ සහිත වසර 17 ක සිර දඬුවමක් මහාධිකරණ විනිසුරු ආර්.එස්.එස් සපුවිද මහතා නියම කළේය.
වසර 2016 දෙසැම්බර් මස 01 සහ 31 අතර කාලයේ දී පන්විලතැන්න ප්‍රදේශයේ දී වයස අවුරුදු 16 නොඉක්මවූ පාසල් සිසුවෙකුට බරපතල ලිංගික අපයෝජනයක් සිදුකළ බවට විත්තිකරුට චෝදනා එල්ල වී තිබිණි.
විත්තරුට එරෙහිව චෝදනා දෙකක් යටතේ නඩුව ගොනුකර තිබූ අතර පළමු වරදට බරපතල වැඩ සහිත වසර 07 ක සිරදඬුවමක් ද ඊට අමතරව රුපියල් 10000 ක දඩයක් ද මහාධිකරණ විනිසුරුවරයා නියම කළේය. අදාළ මුදල නොගෙනවන්නේ නම් ලිහිල් වැඩ සහිත තවත් මාස 06 ක සිර දඬුවමක් නියම වන බවද විනිසුරුවරයා දැනුම් දුන්නේය.
දෙවන වරදට බරපතල වැඩසහිත වසර 10 ක සිර දඬුවමක් නියම කළ මහාධිකරණ විනිසුරු ආර්.එස්.එස් සපුවිද මහතා ඊට අමතරව රුපියල් 15000 ක දඩයක් පනවමින් එය නොගෙවන්නේ නම් ලිහිල් වැඩ සහිත තවත් මාස 06 ක සිරදඬුවමක් නියම කළේය.
පළමු හා දෙවන චෝදනා සම්බන්ධයෙන් නියම වූ වසර 07 ක හා 10 ක බරපතල සිරදඬුවම එකවර ගෙවීයන ලෙස ලබාදුන් මහාධිකරණ විනිසුරුවරයා අපයෝජනයට ලක්වූ දරුවාට රුපියල් 250000 ක මුදලක් ගෙවන ලෙස ද චූදිතට නියම කළේය.
එම මුදල නොගෙවන්නේ නම් ලිහිල් වැඩ සහිත වසරක සිරදඬුවමක් නියම වන බවද විනිසුරුවරයා දැනුම් දුන්නේය.
මෙලෙස දඩ හා සිරදඬුවම් නියම වූයේ කැලණිය ශීලදස්සි හිමි නොහොත් හඳුවල දේවගේ හෂාන් හේමරත්න නැමැති අයෙකුටය.
