පොල් ගෙඩි 20 ක් සොරකම් කිරීමේ චෝදනාවකට වරදකරු වූ අයෙකුට වසරක සිරදඬුවමක්
Friday, 26 May 2023 - 7:04 pm
(දමිත් තිසර- මිනුවන්ගොඩ)
දිවුලපිටිය, කෙහෙල්ඇල්ල ප්‍රදේශයේ වත්තකට සොරෙන් ඇතුල්වී පොල් ගෙඩි 20 ක් සොරකම් කිරීමට සහ අයුතු ලෙස වත්තට ඇතුල්වීම යන චෝදනා දෙකට වැරදිකරු වූ අයෙකුට වසරක සිරදඬුවමක් නියමවී තිබෙන බව වාර්තා වෙනවා.
රුපියල් 1200ක් වටිනාකම ඇති එම පොල් ගෙඩි සොරකමට සහ වත්තට ඇතුල්වීම යන චෝදනා දෙකට දඬුවම් නියමවී ඇත්තේ එක් චෝදනාවකට මාස තුන බැගින්.
ඒ බරපතල වැඩ ඇතුව එක් වසරක සිරදඬුවම නියම කර තියෙන්නේ මිනුවන්ගොඩ මහේස්ත්‍රාත්වරිය වන ටී. තේනබදු යි.
චුදිතට පෙර වැරදි නොමැති බවට ඇඟිලි සටහන් වාර්තා අනුව සනාථ වී ඇති හෙයින් නියම කළ බරපතළ වැඩ ඇතිව එක් වසරක සිර දඬුවම වසර 10 කට අත්හිටුවන ලෙසට නියම කර තිබෙනවා.
එම වසර දහය යහපත් කල් ක්‍රියාවෙන් ගෙවන ලෙසට චුදිතට අධිකරණයෙන් නියම කෙරුණා.
දිවුලපිටිය, කෙහෙල් ඇල්ල ප්‍රදේශයේ පදිංචිකරුවෙකු වූ එක්දරු පියකු ට යි මෙසේ අත්හිටවූ සිර දඬුවම් නියම කෙරුණේ.
ඔහු 2021 ජනවාරි මස 31 හෝ ඊට ආසන්න දිනයකදී දිවුලපිටිය, කෙහෙල්ඇල්ලේ දී අදාළ සොරකම සිදු කර තිබූ බවට අධිකරණයේ දී සඳහන්ව තිබුණා.
