(සම්පත් කුලරත්න -කළුතර)
කළුතර නගරයේ ලැගුම්හලක පස්මහල් ගොඩනැගිල්ලකින් ඇදවැටී මියගිය 16 හැව්රිදි පාසල් සිසුවියගේ මරණය සම්බන්දයෙන් දැනට රිමාන්ඩ් බන්ධනාගාර ගතකර සිටින සැකකරුවන් හතර දෙනා අද කළුතර මහේස්ත්‍රාත් අධිකරණයට රැගෙන එන ලදී.
සැකකරුවන්ට එල්ලවී ඇති චෝදනා අනුව කළුතර ප්‍රධාන මහේස්ත්‍රාත් නීතා හේමාලී හාල්පන්දෙනිය මහත්මිය අද (26) දක්වා රිමාන්ඩ් බන්ධනාගාර ගතකරන ලෙස නියෝග කර තිබූණි.
දැරිය පස්මහල් ගොඩනැගිල්ලෙන් ඇදවැටෙන මොහොතේ ඇය සමග කාමරයේ සිටී බව කියන ප්‍රධාන සැකකරු, ඇය හෝටලයට කැටුව ගිය බව කියන දෙවන සැකකරු වන කළුතර උතුර ප්‍රදේශයේ පදිංචි 23 හැව්රිදි තරුණයා, තුන්වන සැකකරු වන කළුතර නාගොඩ ප්‍රදේශයේ පදිංචි 19 හැව්රිදි තරුණිය සහ ප්‍රධාන සැකකරුගේ මෝටර් රථය පදවාගෙන ගිය බව කියන 4 වන සැකකරු වන බේරුවල වලතර ප්‍රදේශයේ පදිංචි 23 හැව්රිදි පුද්ගලයකු මෙසේ අධිකරණයට රැගෙන එන ලදී .
දකුණු කළුතර, ප්‍රධාන වීදිය, අංක 402 ලිපිනයේ පිහිටී සිසිලියන් වෝක් හෝටලය පිටුපස රේල්පාරේ ඉකුත් 6 දා රාත්‍රි වැටී මියගොස් සිටී සොයාගන්නා ලද කළුතර, නාගොඩ , සැනසුම 115 නිවසේ පදිංචිව සිටී ටිහාරා නිර්මානි නිශ්සංක සිල්වා දැරියගේ මරණය සම්බන්දයෙන් සැකකරුවන්ට චෝදනා එල්ලවී රිමාන්ඩ් බන්ධනාගාර ගතකර තිබෙ.
අපරාධය සම්බන්දයෙන් විමර්ශන සිදුකරන අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන විමර්ශන අංශයේ නිළධාරීන් ද කළුතර මහේස්ත්‍රාත් අධ්කරණයට පැමිණ සිටී අයුරු දැකගත හැකිවිය .
